Home Indian news விருப்பமில்லாத மனைவியை கட்டாயப்படுத்தி உடலுறவு கொள்வதில் தவறில்லை; நீதிமன்றம் உத்தரவு!

விருப்பமில்லாத மனைவியை கட்டாயப்படுத்தி உடலுறவு கொள்வதில் தவறில்லை; நீதிமன்றம் உத்தரவு!

விருப்பமில்லாத மனைவியை கட்டாயப்படுத்தி கணவர் உடலுறவு கொள்வது தவறில்லை என இந்திய சத்தீஸ்கர் மாநில உயர் நீதிமன்ம் தீர்ப்பளித்துள்ளது.

சத்தீஸ்கர் உயர் நீதிமன்றம் அளித்துள்ள இந்தத் தீர்ப்பு அதிர்ச்சி அளிப்பதாக பலரும் கருத்து தெரிவித்துவருகிறார்கள். குறிப்பாகச் சமூக வலைதளங்களில் இது குறித்த எதிர்ப்பை அதிகம் காண முடிகிறது.

“ஒரு ஆணுக்கும் அவரது சட்டப்பூர்வ திருமணமான மனைவிக்கும் இடையிலான பாலியல் உறவு, வலுக்கட்டாயமானதாகவோ, அவளுடைய விருப்பத்திற்கு எதிராகவோ இருந்தாலும், அது பலாத்காரம் அல்ல” என்பதுதான் அந்தத் தீர்ப்பு.

சுருக்கமாகக் கூறினால், மனைவியைக் கணவன் பாலியல் ரீதியாகப் பாலாத்காரப்படுத்துவது தவறல்ல என்பதே அந்தத் தீர்ப்பு.

சத்தீஸ்கர் மாநிலத்தைச் சேர்ந்த குடும்பத் தலைவி ஒருவர், தன் கணவனிடமிருந்து விவாகரத்து கோரி சதீஸ்கர் உயர் நீதிமன்றத்தை நாடினார். அவர் தனது மனுவில், “எனது கணவர், என்னை பலவந்தப்படுத்தியும், இயற்கைக்கு மாறாகவும் உடலுறவு கொள்கிறார்” என குற்றம் சாட்டியிருந்தார்.

இதை விசாரித்த நீதிமன்றம், “இயற்கைக்கு மாறான வழிகளில் உடலுறவு கொள்வது, இந்திய தண்டனை சட்டம் பிரிவு 377 இன் கீழ் குற்றமே. அதே நேரம், 18 வயதுக்கு மேல் உள்ள – சட்டப்பூர்வமான மனைவியை, வற்புறுத்தி உடலுறவு கொள்வது சட்டப்படி பலாத்காரம் அல்ல” என்று தீர்ப்பளித்துள்ளது.

வழக்கறிஞர் சுதா, “இப்போது இந்தத் தீர்ப்பை பலரும் கவனித்திருப்பதால், அதிர்ச்சி அலை ஏற்பட்டிருக்கிறது. ஆனால் இது போன்ற தீர்ப்புகள் பல வந்திருக்கின்றன.

மும்பை கூடுதல் அமர்வு நீதிமன்றம் கடந்த மாத தொடக்கத்தில், இதே போல, கணவர் பலாத்காரப்படுத்தி உடலுறவு கொள்வதாக ஒரு பெண்மணி வழக்கு தொடுத்தார். அதற்கு நீதிமன்றம், அவர் கணவனாக இருப்பதால் அவர் சட்டவிரோதமான காரியத்தைச் செய்தார் என்று கூற முடியாது! என்று கூறிவிட்டது” என்கிறார் வழக்கறிஞர் சுதா.

READ MORE >>>  வரதட்சணை கொடுமையால் உடலுறவுக்கு மறுத்த கணவன்; மனைவி புகார்.

இதே போன்ற விவகாரத்தில் கேரள உயர் நீதிமன்றம், “ஓரளவு வேறு மாதிரியான” என்கிற அளவிலான தீர்ப்பை அளித்திருக்கிறது. கேரளாவைச் சேர்ந்த பெண் ஒருவர், கணவர் மீது பலாத்காரக் குற்றம் சுமத்தி விவாகரத்து கோரினார்.

marital rape 3

முடிவில் நீதிமன்றம்,“மனைவியின் விருப்பம் இல்லாமல், பாலியல் பலாத்காரம் செய்யும் கணவனை தண்டிக்கச் சட்டத்தில் இடமில்லை. ஆனால் மனைவியின் தனிப்பட்ட விருப்பு வெறுப்புகளை மதிக்காமல், அவரை துன்புறுத்தியதை ஏற்க முடியாது. ஆகவே விவாகரத்து அளிக்கிறோம்!” என்றது.

இதே போன்ற சம்பவங்கள் தமிழ்நாட்டிலும் நடந்துள்ளன.

மதுரையைச் சேர்ந்த பெண் ஒருவர், தனது கணவர் மீது பலாத்கார புகார் அளித்தார். வழக்கை விசாரித்த மகளிர் நீதிமன்றம், அந்த கணவருக்கு 10 ஆண்டு சிறைத் தண்டனை அளித்தது. கணவர், சென்னை உயர் நீதிமன்றத்தில் மேல் முறையீடு செய்ய, அவருக்கு வழங்கப்பட்ட தண்டனையை, நீதிமன்றம் ரத்து செய்துவிட்டது.

பெண்ணுரிமை ஆர்வலர் யாழினி, “இந்து திருமண சட்டத்தின்படி, தம்பதிகளில் இருவருக்கிடையே சில பொறுப்புகள் உண்டு, உரிமையும் உண்டு. திருமணமான பெண்கள் தங்கள் இணையின் பாலியல் விருப்பத்திற்கு மறுப்பு தெரிவிப்பதை ஆண்கள் கொடூரமானதாகக் கருதுகிறார்கள். எனவே பாலியல் விருப்பத்திற்கு இசையாவிட்டால் அதைக் காரணமாக காட்டி, விவாகத்தை ரத்து செய்யலாம் என்றும் நம்பப்படுகிறது.

ஒருபக்கம் வன்புணர்வுச் சட்டம், இன்னொரு புறம், இந்துத் திருமணச் சட்டம். இவை ஒன்றுகொன்று எதிரானதாக இருக்கின்றன. இதனாலேயே திருமண உறவில் பலாத்காரம் என்பது பற்றி சரியான தெளிவு இல்லை. ஆனால் மேற்கத்திய நாடுகளில், மனைவியின் அனுமதி இன்றி பலாத்காரப்படுத்துவது குற்றம். அது போன்ற தெளிவான சட்டம் இங்கே வேண்டும்” என்கிறார்.

இது குறித்த வழக்கு ஒன்றும், டில்லி உயர் நீதிமன்றத்தில் தொடுக்கப்பட்டது.

READ MORE >>>  முதலிரவை வீடியோ எடுத்து பணம், நகை பறிப்பு!

ரிட் ஃபவுண்டேஷன், அனைத்திந்திய ஜனநாயக மாதர் சங்கம் ஆகிய அமைப்புகள், “திருமண உறவில் வன்புணர்வு தொடர்பான சட்டம் தேவை” என பொதுநல மனு தாக்கல் செய்தன. .

ரிட் ஃபவுண்டேஷனின் தலைவர் சித்ரா அவஸ்தி, “பாலியல் பலாத்காரம் என்பதன் அர்த்தம், திருமணமான பெண்களுக்கு மட்டும் வேறுமாதிரியாகப் பார்க்கப்படுவதை ஏற்க முடியாது. மனைவியின் விருப்பம் இல்லாமல் கணவன் வலுக்கட்டாயமாக உடலுறவு கொண்டால் அதுவும் பலத்காரம்தான்” என்கிறார்.

verdict

ஆண்களின் உரிமைகளுக்காக குரல் கொடுக்கும், “மென் வெல்ஃபர் டிரஸ்ட்” என்ற அமைப்பு, நீதிமன்றத்தில் வேறு கருத்தை வைத்தது. இதன் தலைவர் அமித் லகானி, “திருமணமான பெண்களை, கணவன் எந்த விதத்திலாவது கட்டாயப்படுத்தினால் அதைத் தடுக்கப் பல சட்டங்கள் இருக்கின்றன. அவர்கள் அந்தச் சட்டங்களின் உதவியை நாடலாம். ஆனால், திருமண உறவில் பலாத்காரம் என்பதாகச் சொல்லி, அதற்காக தனிச்சட்டம் ஏற்படுத்த வேண்டிய அவசியமில்லை” என்கிறார்.

இதையே, தமிழ்நாடு ஆண்கள் பாதுகாப்பு சங்கத் தலைவர் அருள் துமிலனும் தெரிவிக்கிறார். “ஏற்கெனவே, வரதட்சணை தடுப்பு சட்டத்தை தவறாக பயன்படுத்தும் பெண்கள் இருக்கின்றனர். இது குறித்து உச்ச நீதிமன்றமே கருத்து தெரிவித்துள்ளது. வரதட்சணை தடுப்பு வழக்குகள் பெரும்பாலும் தள்ளுபடி செய்யப்படுவதில் இருந்தும் இதை அறியலாம். இந்நிலையில், பலாத்காரம் குறித்த சட்டம் இயற்றப்பட்டால் அது ஆண்களுக்கு எதிராகவே அமையும். ஏனென்றால், மனைவி சொல்வதே ஆதாரம் என ஆகிவிடும்” என்கிறார்.

வழக்கறிஞர் மாலா, “எந்தவொரு சட்டத்தையும் தவறாக பயன்படுத்துபவர் சிலர் இருக்கலாம் அதற்காக சட்டமே தேவையில்லை என சொல்ல முடியுமா? தவிர வழக்கு தள்ளுபடி ஆகிறது என்றால், நிரூபிக்க முடியாக வழக்காக இருக்கலாம். இதில் காவல்துறைக்கும் பொறுப்பு உண்டு. இதை வைத்து, பொய் வழக்கு என சொல்ல முடியாது. ஆகவே, பலாத்கார தடுப்பு சட்டத்தில் மனைவியையும் சேர்ப்பது காலத்தின் அவசியம்” என்கிறார்.

READ MORE >>>  சமோசா விலையேறியதால் இளைஞன் மனமுடைந்து தற்கொலை!

இந்த குறித்து மேற்கத்திய நாடுகளில் சட்டங்கள் இருந்தாலும், இங்கே இன்னும் இது பேசுபொருளாகவே இருக்கிறது.

இதற்கான காணத்தை பாஜகவின் மேனகா காந்தி ஒரு முறை தெரிவித்தார். அவர், “நம் நாட்டில், கல்வியின்மை, வறுமை, சமூகப் பழக்க வழக்கங்கள், மத நம்பிக்கைகள் ஆகியவை, “திருமணம் புனிதம்” என்ற மாயையே ஏற்படுத்தி உள்ளன. ஆகவே, திருமண உறவில் பலாத்காரம் நடப்பதைக் குற்றமாக்கும் சட்டத்தைக் கொண்டுவருவது சிரமம்தான்” என்று வருத்தத்துடன் தெரிவித்திருந்தார்.

family-system

ஆனால் ஒன்றிய அரசின் கருத்து வேறாக இருக்கிறது. இது குறித்த பொது நலவழக்கில், 2017ஆம் ஆண்டு டெல்லி உயர் நீதிமன்றத்தில், “திருமண உறவில், பலாத்காரத்தைக் குற்றமாகக் கருத ஆரம்பித்தால் குடும்பம் என்ற அமைப்பு சிதைந்துவிடும். ஆகவே, திருமண உறவில் பலாத்காரம் ஒரு குற்றச் செயல் என அறிவிக்க இயலாது. கணவனுக்கு எதிராக மனைவி இந்தச் சட்டத்தைத் தவறாகப் பயன்படுத்தக்கூடும்” என்றது.

அதே நேரம், நிர்பயா வல்லுறவு வழக்கிற்கு பிறகு உருவாக்கப்பட்ட நீதிபதி வர்மா கமிட்டி திருமண பந்தத்தில் பலாத்காரம் செய்யப்படுவது தொடர்பாகத் தனிச் சட்டம் வேண்டும் என்று தெரிவித்தது குறிப்பிடத்தக்கது.

ஆனால், ‘கல்லானாலும் கணவன், புல்லானாலும் புருஷன்’, ‘கணவனே கண்கண்ட தெய்வம்’ என்பதுபோன்ற பழமொழிகள் புழங்கும் நம் சமுதாயத்தில், கணவனின் பலாத்காரத்தைத் தடுக்க சட்டம் வருமா என்பது கேள்விக்குரிய, வருத்தத்துக்குரிய விடயம்தான்!

என்ன நண்பர்களே!! இந்த தகவலை படிச்சீங்களா மறக்காம ஒரு சார் பண்ணிட்டு போங்க.. மேலும் இது போன்ற செய்திகளை தொடர்ந்து படிக்க எமது jaffna7.com இணையத்திற்கு நேரடியாக வாங்க.

Previous articleகாதல் ஜோடியால் யாழில் கலவரம்.
Next articleகொவிட் தொற்றுக்கு 175 பேர் பலி; இதுவரை 10864 பேர் உயிரிழப்பு!